ÍA og Olís framlengja

27.01 2015

Í dag undirrituðu Knattspyrnufélag ÍA og Olís nýjan samstarfssamning til þriggja ára.  Frá árinu 1982 hefur Olís verið einn af aðalsamstarfsaðilum Knattspyrnufélags ÍA.  Á þeim tíma hefur samstarf aðilanna verið báðum aðilum ákaflega farsælt og hefur Knattspyrnufélag ÍA t.a.m. skilað 16 Íslands- og bikarmeistaratitlum í meistaraflokki karla á þessu tímabili.


Magnús Guðmundsson formaður Knattspyrnufélags ÍA:  „Við hjá Knattspyrnufélagi ÍA erum ákaflega stoltir af því að Olís hefur ákveðið að endurnýja samstarfssamning við okkur og lítum á það sem mikið traust á þeirri miklu uppbyggingarvinnu sem farið hefur fram í félaginu á undanförnum árum.  Við sjáum þess merki í starfi félagsins að bjartari tímar eru framundan og vonandi er þess ekki langt að bíða að enn betri árangur skili sér í hús. Það er jafnframt von okkar að félagsmenn og aðrir stuðningsmenn ÍA fylki sér á bakvið þá aðila sem styðja félagið“


Jón Ólafur Halldórsson forstjóri Olís: „ Olís og ÍA hafa bundist sterkum vinatengslum í fjöldamörg ár.  Stuðningur Olís er ekki eingöngu fjárframlag heldur einnig til ávinnings fyrir unglinga og barnastarf með ýmsar fjáröflunarvörur.  Við hjá Olís erum stolt af okkar samstarfi við ÍA og óskum þeim alls hins besta á komandi árum."

Til baka