ÍA tapaði gegn FH í kvöld í baráttuleik

26.07 2016

Meistaraflokkur kvenna spilaði við FH í kvöld í tíundu umferð Pepsi-deildarinnar. FH byrjaði af miklum krafti og náði að skora snemma leiks. FH hélt svo áfram að sækja og fengu ágæt færi sem þeir náðu ekki að notfæra sér en Skagamenn spiluðu mjög sterkan varnarleik og byggðu á skyndisóknum. ÍA fékk nokkur hálffæri í hálfleiknum sem ekki náðist að nýta. Baráttan var í fyrirrúmi í leiknum og ætlaði hvorugt liðið að gefa neitt eftir. Staðan í hálfleik var því 1-0. 

 

Í seinni hálfleik var svo áfram mikil barátta í gangi þar sem Skagamenn sóttu nokkuð án þess að skapa umtalsverð færi en FH átti í mesta basli með að skapa sér álitleg færi gegn sterkri vörn ÍA. Stelpurnar náðu að jafna á 60. mínútu þegar Cathrine Dyngvold skoraði með góðu skoti eftir undirbúning frá Mareni Leósdóttur. Því miður náði FH svo að skora sitt annað mark fimm mínútum síðar eftir góða sókn.

 

Stelpurnar börðust af krafti og áttu góðar sóknir til að jafna metin en sem fyrr var vandamálið að nýta færin og koma boltanum í netið. FH spilaði af varkárni og beittu öflugum skyndisóknum sem strönduðu oftast á sterkri vörn ÍA. Þrátt fyrir ágætar sóknarlotur Skagamanna undir lokin náðist ekki að jafna metin. Leikurinn endaði því 2-1 fyrir FH.
 

Næsti leikur er gegn Þór/KA á Norðurálsvellinum sem fer fram sunnudaginn 7. ágúst kl.15:00. Við hvetjum Skagamenn til að mæta og styðja við bakið á stelpunum.

Til baka