Íþróttabandalag Akraness er 70 ára í dag

03.02 2016

Íþróttabandalag Akraness er 70 ára í dag. Það var stofnað þann 3.febrúar árið 1946 af knattspyrnufélögunum KA og Kára. Fyrsti formaður þess var Þorgeir Ibsen.

ÍA tók við af Íþróttaráði Akraness sem var stofnað af sömu félögum árið 1934.

Árið 1946 var ár mikilla framfara í íþróttastarfsemi á Akranesi. Í lok þess árs var íþróttahúsið við Laugarbraut tekið í notkun, það breytti allri aðstöðu við iðkun íþrótta.

Þá er ákveðið að taka þátt í Íslandsmóti meistaraflokks í knattspyrnu. Fyrst í stað var nafn Íþróttabandalags Akraness skammstafað ÍBA. Því var breytt skömmu síðar í ÍA, þar sem Íþróttabandalag Akureyrar var með sömu skammstöfun.

Þá gerðist það árið 1946, að Akurnesingar hlutu sinn fyrsta Íslandsmeistaratitil, er 2. flokkur vann frækinn sigur á Íslandsmótinu í knattspyrnu.

Á þessum 70 árum hefur íþróttastarf á Akranesi vaxið og dafnað, ÍA unnið fjölda meistaratitla í hinum ýmsu íþróttagreinum, átt Ólympíufara og íþróttamenn ársins á Íslandi.

Aðildarfélög ÍA er 18 talsins og iðkendur um 2.500. ÍA mun fagna þessum tímamótum með ýmsum hætti á þessu ári og horfir björtum augum til framtíðar.

Knattspyrnufélag ÍA (KFÍA) er jafnframt 30 ára á árinu en það var stofnað með sameiningu knattspyrnufélaganna KA og Kára.  KFÍA mun fagna afmælinu með hátíðaraðalfundi 18. febrúar næstkomandi þar sem m.a. Geir Þorsteinsson formaður KSÍ verður heiðursgestur og nokkrir fyrrum knattspyrnumenn og aðrir einstaklingar sem hafa staðið þétt við bakið á knattspyrnunni á Akranesi verða heiðraðir. 

Til baka