Jón Þór Hauksson skrifar undir nýjan samning við KFÍA

16.10 2016

Knattspyrnufélag ÍA mun áfram njóta krafta Jóns Þórs sem yfirþjálfara yngri flokka og afreksstarfs og einnig sem aðstoðarþjálfara meistaraflokks karla.

 

Jón Þór Hauksson hefur skrifað undir áframhaldandi samning við Knattspyrnufélag ÍA (KFÍA). Jón Þór hefur starfað hjá félaginu sem þjálfari undanfarin 8 ár. Jón Þór tók við starfi yfirþjálfara haustið 2013 en hann hefur síðan þá einnig verið aðstoðarþjálfari mfl.karla.

 

Jón Þór: „Það eru mjög spennandi hlutir að gerast í KFÍA og frábært að fá að taka þátt í þessari þróun. Við erum að hefja okkar þriðja tímabil í Pepsi deild karla, við teljum okkur vera á réttri leið með liðið og ég er spenntur fyrir því að halda áfram þeirri vegferð. Það er einnig margt óunnið þar með þann hóp og hlakka ég til áframhaldandi samstarfs okkar Gunnlaugs Jónssonar með liðið. Með ráðningu öflugra þjálfara síðustu vikna fyrir meistaraflokk kvenna og í alla yngri flokka félagsins hefur félagið sýnt metnað sinn í að vera fremstu röð í þjálfun í öllum flokkum kvenna og karla.  Í vetur munum við leggja áherslu á  að þróa og gefa ungum leikmönnum tækifæri og það er stefna félagsins að halda áfram að hlúa vel að ungum og efnilegum leikmönnum.Ég tek nýjum áskorunum fagnandi og Hlakka til að starfa með þessum öflugu þjálfurum, stjórn félagsins og starfsmönnum sem eru einhuga um að koma félaginu öllu í fremstu röð.“

 

Hulda Birna Baldursdóttir framkvæmdastjóri KFÍA: ,,Þetta er einn liður í því að tryggja það að byggja upp öflugt uppeldis- og afreksstarf og vera með þjálfara í fremstu röð, eins og Jón Þór, hann er mikilvægur hlekkur í keðjunni”.



Gunnlaugur Jónsson þjálfari ÍA: “Ég er gríðarlega ánægður með að félagið hafi framlengt samning sinn við Jón Þór. Hann hefur sýnt og sannað að hann er frábær þjálfari og hefur stjórnað með myndarskap uppbyggingu á yngri flokkum félagsins. Samstarf okkar hefur gengið frábærlega og hann er mjög mikilvægur hlekkur í því sterka teymi sem kemur að meistaraflokki karla. Það er frábært að það sé staðfest að teymið sem kemur að þjálfun liðsins helst óbreytt á næsta tímabili en auk mín og Jóns Þórs eru það Guðmundur Hreiðarsson markmannsþjálfari, Hjalti Rúnar Oddsson þrek- og sjúkraþjálfari og Viðar Halldórsson  íþróttafélagsfræðingur.

 

Á meðfylgjandi mynd má sjá Huldu Birnu Baldursdóttur, framkvæmdastjóra félagsins, Jón Þór Hauksson og Sævar Frey Þráinsson, varaformann stjórnar félagsins, við undirritun samningsins.

Til baka