Kristinn og Steindóra ráðin sem þjálfarar meistaraflokks kvenna ÍA

01.08 2016

Þórður Þórðarson óskaði nýlega eftir að láta af störfum af persónulegum ástæðum sem þjálfari meistaraflokks kvenna hjá Knattspyrnufélag ÍA, en Ágúst Valsson aðstoðarþjálfari Þórðar mun einnig láta af störfum á sama tíma.

Gengið hefur verið frá því að Kristinn H. Guðbrandsson og Steindóra Steinsdóttir taki við þjálfun meistaraflokks kvenna út keppnistímabilið.

Kristinn er 46 ára íþróttafræðingur sem er með UEFA A gráðu í þjálfun. Kristinn var reynslumikill leikmaður á sínum tíma en lengst af lék hann með Keflavík þar sem hann lék 115 leiki í efstu deild. Auk þess varð hann bikarmeistari með liðinu árið 1997. Kristinn hefur einnig víðtæka reynslu í þjálfun en hann var aðstoðarþjálfari hjá Keflavík og síðar Fylki í efstu deild en auk þess hefur hann þjálfað meistaraflokka Víðis Garði og Víking Ó. Undanfarin ár hefur hann þjálfað yngri flokka hjá ÍA.

Steindóra er 44 ára íþróttafræðingur. Steindóra lék á sínum tíma yfir 100 leiki fyrir ÍA í efstu deild. Steindóra hefur leikið 6 A-landsleiki fyrir Ísland og 4 landsleiki með undir 20 ára landsliði Íslands. Steindóra hefur starfað lengi við kvennaknattspyrnu hjá ÍA, bæði sem þjálfari yngri flokka en einnig aðstoðað við þjálfun meistaraflokks ÍA.

Undirbúningur að ráðningu framtíðarþjálfara meistaraflokks kvenna er hafinn í samráði við Jón Þór Hauksson yfirþjálfara félagsins.

Stjórn KFÍA vill nota tækifærið og þakka Þórði fyrir gott samstarf og framúrskarandi störf fyrir KFÍA.  Ágúst fær sömuleiðis þakkir fyrir góð störf.  Stjórn óskar nýjum þjálfurum til hamingju með nýja starfið og hlakkar til samstarfsins.

Á meðfylgjandi mynd eru Kristinn H. Guðbrandsson og Steindóra Steinsdóttir ásamt Sævari Frey Þráinssyni varaformanni Knattspyrnufélags ÍA.

Til baka