Stelpurnar töpuðu gegn Selfoss í kvöld

24.05 2016

Meistaraflokkur kvenna spilaði í kvöld við Selfoss í Akraneshöll en leikurinn var færður inn vegna veðurs. Töluvert jafnræði var framan af í fyrri hálfleik milli liðanna en Selfoss skapaði sér hættulegri færi og skoraði mark á 30. mínútu. Stelpurnar lögðu þó ekki árar í bát heldur reyndu að jafna metin og sköpuðu nokkur góð færi sem ekki náðist að nýta. Staðan var því 1-0 í hálfleik.
 

Í seinni hálfleik var svo mikil stöðubarátta framan af og hvorugt liðið ætlaði að gefa neitt eftir. Stelpurnar börðust af krafti og á löngum köflum í hálfleiknum átti Selfoss í mestu vandræðum með sóknarleik ÍA en ekki náðist að klára færin þegar þau komu. Á 73. mínútu náði Selfoss að skora sitt annað mark eftir góða skyndisókn og eftir það var þetta orðið erfitt. Stelpurnar héldu þó áfram að sækja og reyna að komast inn í leikinn en þrátt fyrir góðar tilraunir tókst það ekki. Leikurinn endaði því með 0-2 sigri Selfoss.
 

Næsti leikur er svo gegn Fylki laugardaginn 28. maí kl. 14:00 í Árbænum. Við hvetjum Skagamenn til að mæta og styðja við bakið á stelpunum.

Til baka