Skagamenn unnu mikilvægan sigur á Val

17.07 2016

Meistaraflokkur karla spilaði í kvöld við Val á Norðurálsvelli í 11. umferð Pepsi-deildarinnar. Skagamenn þurftu á þremur stigum að halda í fallbaráttunni og til að halda áfram góðu gengi eftir þrjá sigurleiki í röð. Valsmenn byrjuðu leikinn þó af miklum krafti og áttu okkar menn í vök að verjast framan af. Vörn ÍA hélt þrátt fyrir stífa sókn gestanna og gegn gangi leiksins skoraði Ármann Smári Björnsson á 33. mínútu þegar hann átti þrumuskalla í þaknetið eftir innkast frá Jóni Vilhelm Ákasyni.

 

Einungis fimm mínútum síðar kom annað mark Skagamanna þegar Garðar Gunnlaugsson skoraði með frábæru skoti eftir aukaspyrnu af 25 metra færi. Nokkur hálffæri komu svo í kjölfarið en Valur hafði fengið mun betri færi sem þeir nýttu ekki. Staðan í hálfleik  var því 2-0.

 

Seinni hálfleikur hófst svo svipað og fyrri hálfleikur endaði. Valur sótti af miklum krafti og Skagamenn bökkuðu mikið og beittu skyndisóknum. Það reyndi umtalsvert á vörn ÍA í seinni hálfleik þar sem gestirnir gerðu allt sem þeir gátu til að minnka muninn. Það tókst þeim á 64. mínútu og það sem eftir lifði leiks voru Valsmenn í sókn til að jafna metin en náðu aldrei að brjóta sterka vörn okkar niður þar sem fagurhærðu tvíburarnir Ármann Smári Björnsson og Arnór Snær Guðmundsson voru í fararbroddi.

 

Skagamenn fengu nokkur ágæt færi sem ekki náðist að nýta. Baráttan var í algleymingi í þessum leik og ætluðu okkar menn að skila þremur stigum í hús sem gerðist að lokum. Leikurinn endaði því með 2-1 sigri ÍA þar sem um var að ræða hreinan vinnusigur og liðsheildin stóð upp úr.


Liðsskipan var þannig að Árni Snær var í marki. Í vörninni voru Darren, Ármann Smári, Arnór Snær og Hallur. Á miðjunni voru Iain James, Arnar Már, Ólafur Valur og Jón Vilhelm. Í sókninni voru Tryggvi Hrafn og Garðar. Varamenn sem spiluðu leikinn voru Ásgeir og Þórður Þorsteinn.
 

Næsti leikur er svo gegn ÍBV á Norðurálsvelli sunnudaginn 24. júlí kl. 17:00. Við hvetjum Skagamenn til að mæta og styðja okkar menn.

Til baka