Stelpurnar eru úr leik í bikarnum eftir tap gegn Haukum

11.06 2016

Meistaraflokkur kvenna spilaði við Hauka í dag í 16-liða úrslitum í Borgunarbikarnum. Haukar byrjuðu af nokkrum krafti og fengu ágæt færi sem þeir náðu ekki að notfæra sér. Eftir því sem leið á hálfleikinn komst ÍA betur inn í leikinn og skapaði sér álitleg færi sem ekki náðist að nýta.Töluverð barátta var í leiknum og ætlaði hvorugt liðið að gefa neitt eftir. Staðan í hálfleik var 0-0 þrátt fyrir góðar tilraunir af hálfu beggja liða.
 

Í seinni hálfleik var svo áfram mikil barátta í gangi og bæði lið sóttu nokkuð en herslumuninn vantaði þegar kom að vítateig liðanna. Stelpurnar börðust af krafti og áttu góðar sóknir en sem fyrr var vandamálið að nýta færin og koma boltanum í netið. Haukar spiluðu af skynsemi og beittu öflugum skyndisóknum sem strönduðu oftast á sterkri vörn ÍA. Haukar náðu þó að skora gott mark um miðjan hálfleikinn og þrátt fyrir mikla sókn ÍA undir lokin náðist ekki að jafna metin. Leikurinn endaði því 1-0 fyrir Hauka og stelpurnar úr leik í bikarnum í ár.
 

Næsti leikur er gegn ÍBV í Vestmannaeyjum sem fer fram föstudaginn 24. júní kl 17:15. Við hvetjum Skagamenn til að mæta og styðja við bakið á stelpunum.

Til baka