Stelpurnar töpuðu gegn ÍBV í hörkuleik

25.06 2016

Meistaraflokkur kvenna spilaði við ÍBV í dag í fimmtu umferð Pepsi-deildarinnar. Eyjamenn byrjuðu af nokkrum krafti og fengu ágæt færi sem þeir náðu ekki að notfæra sér. Eftir því sem leið á hálfleikinn komst ÍA betur inn í leikinn og skapaði sér álitleg færi sem ekki náðist að nýta.Töluverð barátta var í leiknum og ætlaði hvorugt liðið að gefa neitt eftir. Rétt fyrir hálfleik lenti varð einn varnarmanna okkar svo fyrir því óláni að skora sjálfsmark. Staðan í hálfleik var þannig 1-0.
 

Í seinni hálfleik var svo áfram mikil barátta í gangi og bæði lið sóttu nokkuð en herslumuninn vantaði þegar kom að vítateig liðanna. Stelpurnar börðust af krafti og áttu góðar sóknir en sem fyrr var vandamálið að nýta færin og koma boltanum í netið. ÍBV spilaði af skynsemi og beittu öflugum skyndisóknum sem strönduðu oftast á sterkri vörn ÍA. Eyjamenn náðu svo að skora sitt annað mark þegar töluvert var liðið á seinni hálfleik. Þrátt fyrir ágætar sóknarlotur ÍA undir lokin náðist ekki að minnka muninn og setja spennu í lokamínúturnar. Leikurinn endaði því 2-0 fyrir ÍBV.
 

Næsti leikur er gegn Stjörnunni á Samsung vellinum sem fer fram fimmtudaginn 30. júní kl 19:15. Við hvetjum Skagamenn til að mæta og styðja við bakið á stelpunum.

Til baka